AF268: 33v

79 Yaʿnĭ mecbūrem dėme kesb ėt kemāl
Vardur insānda cüzʾī iḫtiyār

80 Ḥaq yolında nefsi mecbūr egleme
Rūz‑i ferdā anı maʿẕūr añlama

81 Saʿy ėdersin kesb‑i māl ü cāh içün
Eylemezsin bir ʿamel Allāh içün

82 Ḥırṣa gelseñ beẕl ėdersin iḫtiyār
Dīne gelseñ eylemezsin iʿtibār

83 Çünki cebrīsin ne varursın baña
Yalvarursın üstüḫᵛān içün saña

84 Ḥaq yolında cebrĭ ol ey cimrĭ var
Tā ki mecbūruñ ola her ne ki var

85 Ḥırṣ ḫırs u kelb ü ḫınzīr işidür
Ejder‑i nefsüñ ṭamaʿ bir dişidür

86 Kāse‑i çeşmi ḥarīṣüñ ṭoyumı
Teşnedür yine ḥarīṣ içse yemi

87 Her kimüñ ʿışq‑ile ʿaqlı çāk olur
Cümleten cān olur ̮ʿaybı pāk olur

88 Dāyimā bu ʿışq olsun şād‑mān
Ey göñül derdine dermān u emān

89 Ey belā‑yi ʿırż u nāmūsa devā
Sensin Eflāṭūn‑i cān‑i mübtelā

90 Ger leb‑i hem‑rāzuma olsam qarīn
Söyler idüm ney ki ḥaqqü l‑yaqīn

91 Hem‑zebānından şu kim oldı cüdā
Bī‑zebāndur eylese yüz biñ nevā

92 ʿĀrif‑i ḥaqquñ dili olur kelīl
Muṣṭafānuñ qulıdur aña delīl

93 Nite‑kim şehr‑i ʿArabda bir ʿAcem
Bilmese tāzī lisānın bīş ü kem

94 Ger faṣīḥ ü ger belīġ ü ger edīb
Bī‑zebān ḥikmetde qalur ol ġarīb

95 Lā‑cerem esrār‑i ḥaqq u enbiyā
Qāle gelmez nice dėsün evliyā

96 Bī‑zebān u lāl olurlar bī‑gümān
Tā bulunca ḥāl ehli hem‑zebān

Ḥikāyat‑i munāsib‑maqām dar ṣūrat‑i hazl ki mutażammin‑i // hazārān maʿnā‑i ǧazl āst va nidā kardan‑i ʿArab // żālla‑i ḫᵛūd‑rā ba‑avṣāf ān čīz [?] dar‑miyān‑i ʿAǧamān